चंद्रपूर - चंद्रपूर जिल्हा आणि परिसरात वाढत्या वाहन चोरीच्या घटनांना आळा घालण्यासाठी स्थानिक गुन्हे शाखेने (एलसीबी) कारवाई केली आहे. दिनांक १५ मे २०२६ रोजी स्थानिक गुन्हे शाखेच्या पथकाने गोपनीय माहितीच्या आधारे अत्यंत सतर्कतेने सापळा रचून दोन सराईत आरोपींना ताब्यात घेतले आहे. या कारवाईदरम्यान पोलिसांनी आरोपींकडून एक दुचाकी जप्त केली असून, यामुळे भद्रावती पोलीस स्टेशन अंतर्गत असलेला एक महत्त्वपूर्ण गुन्हा उघडकीस आणण्यात पोलिसांना यश आले आहे. (विसापूरात १७ वर्षीय मुलाची हत्या)
मिळालेल्या माहितीनुसार, स्थानिक गुन्हे शाखेच्या पथकाला आपल्या विश्वसनीय सूत्रांकडून काही संशयित व्यक्तींबाबत अत्यंत गोपनीय माहिती मिळाली होती. या माहितीच्या आधारे पथकाने तातडीने हालचाली करत संशयितांची ओळख पटवली आणि शाम नगर, चंद्रपूर येथील रहिवासी असलेल्या दोन आरोपींना शिताफीने ताब्यात घेतले. यमला तंगराजन कोरवान (वय ४० वर्ष) आणि गोपाल जीवन मालाकर (वय २६ वर्ष) अशी अटक करण्यात आलेल्या आरोपींची नावे आहेत.
पोलिसांनी या दोन्ही आरोपींची कसून चौकशी केली असता, त्यांनी भद्रावती पोलीस स्टेशनच्या हद्दीतून दुचाकी चोरी केल्याची कबुली दिली. आरोपींच्या ताब्यातून पोलिसांनी 'हिरो होंडा स्प्लेंडर' कंपनीची दुचाकी (क्रमांक MH 34 P 1180) हस्तगत केली आहे. या जप्त करण्यात आलेल्या मुद्देमालाची एकूण किंमत ५०,०00/- रुपये इतकी सांगण्यात येत आहे. या यशस्वी कारवाईमुळे भद्रावती पोलीस ठाण्यात दाखल असलेला अपराध क्रमांक ५७४/२५, कलम ३०३(२) बीएनएस (भारतीय न्याय संहिता) अन्वये दुचाकी चोरीचा गुन्हा पूर्णपणे उघडकीस आला आहे.
ही धडक कारवाई स्थानिक गुन्हे शाखेच्या सक्षम पथकाने अत्यंत चोखपणे पार पाडली. या शोध मोहिमेत आणि अटकेच्या कारवाईत पोलीस उपनिरीक्षक विनोद भुरले, पोलीस उपनिरीक्षक सुनील गौरकार यांच्यासह पोलीस हवालदार सुभाष गोहोकार, सतीश अवथरे, रजनिकांत पुठ्ठावार, दीपक डोंगरे, इमान खान तसेच पोलीस अंमलदार हिरालाल गुप्ता, किशोर वाकाटे आणि शशांक बदामवार यांनी महत्त्वपूर्ण भूमिका बजावली. स्थानिक गुन्हे शाखेच्या या यशस्वी कामगिरीमुळे वाहन चोरांचे धाबे दणाणले असून, नागरिकांनी पोलिसांच्या या तत्परतेचे कौतुक केले आहे.
Leave a Comment